(Dialetto Calabrese)

Prestu la frusta hannu priparatu                                                                                                     e cu raggia si misuru a battiri,                                                                                                         e l’hannu tantu forti martrattatu,                                                                                       vulivunu ddhani mu fannu muriri. 

A li tridici uri è misu a la colonna,                                                                                                 cu curuna di spini ncurunatu,                                                                                                        lu vidi e stramurtisci la Madonna,                                                                                                   e poi lu sciatu nci nd’havi turnatu.

Di fora la Madonna lu guardava,                                                                                                   lu guardava e gran duluri teni,                                                                                               Cristu priava u so Patri si ‘llungava                                                                                            mu campa ancora e mi pati cchiuni peni,

A li quattordici uri fu ligatu,                                                                                                           a ‘na colonna e di russu vistutu,                                                                                                  nda li mani ‘na canna nci pusaru,                                                                                                 da turba comu re vinni schirnutu.

Ora si parra di li chindici uri,                                                                                                      ora si dici lu quantu e lu comu,                                                                                               Pilatu chi s’affaccia a lu barcuni,                                                                                                nci lu mmustra a lu populu: Ecceomu.!

Poi nci dissi a ddha genti senza cori:                                                                                             Si lu libiramu, sarìa bbonu.                                                                                                       Tutti gridaru: A la cruci, pe mi mori!                                                                                            Si lava Pilatu  e si chiudi lu tonu.

Nd’hannu pirdutu la facci e lu decoru,                                                                                     undi ndi vinni sta grandi putenza,                                                                                              Oh, eternu Patri, chistu to’ figghiolu,                                                                                      com’è purtatu a tanta pinitenza.

Chiddhu chi patì, lu patìu pill’omu,                                                                                          ch’è piccaturi chi pecca e non penza,                                                                                             fu scrittu a sidici uri lu so’ nomu,                                                                                                  fu la cundanna a morti la sentenza. 

A li diciassett’uri ognunu pensa,                                                                                                  chi gran duluri la so’ matri aviva,                                                                                           vidiva a so’ figghiu ‘n tanta suffirenza,                                                                                   luvava la cruci a ncoddhu non putiva.

Pi caminari faciva viulenza,                                                                                                             e quantu voti cadìu pe la via.                                                                                                        Duluri sentiu ‘a grandi Onnipotenza,                                                                                           ca dettaru mbuttuni e scacciarunu Maria.

Quando a lu munti Carvariu si giungiva,                                                                                       a Gesù lu nchianaru a trascinuni,                                                                                                   e li so vesti chi mbrischiati aviva,                                                                                                 nci li sciupparu cu raggia e cu fururi.

Tutti li piaghi rinnovati aviva,                                                                                                    novi sentiva fragelli e duluri.                                                                                                    L’affritta mamma nchiovari sentiva.                                                                                            Fu misu a ncruci a li diciotto uri.

Si cunta di Gesù lu veru amuri,                                                                                                    chi è amuri perfettu, amuri eternu,                                                                                              comu stremu ndi amau a li piccaturi,                                                                                          ndi vosi libirari dallu mpernu.

Poi iazzau l’occhi a li diciannove uri,                                                                                             e di cori priau la Patri eternu:                                                                                                    Patri pirduna li cricifissuri,                                                                                                           ca su’ pacci e no n’hannu sintimentu.

A li vint’uri fici testamentu,                                                                                                             e a Giuvanni nci dassau matri Maria,                                                                                           poi lu spiritu soi iva pirdendu,                                                                                                        ma iddhu ancora putiri vulìa.

Siziu! dissi e prestu nda mumentu,                                                                                               feli e acitu vinni priparatu,                                                                                                            nciu dettunu e Gesù dissi mbivendu:                                                                              Cunsumatu esti! Ed è spiratu.

Continua a pagina 4.........